مالی سال 13ء کے گیارہ ماہ کے دوران جاری کردہ زرعی قرضے 15.49 فیصد بڑھ کر294.53 ارب روپے تک پہنچ گئے

21 جون 2013ء مالی سال 13ء کے گیارہ ماہ کے دوران جاری کردہ زرعی قرضے 15.49 فیصد بڑھ کر294.53 ارب روپے تک پہنچ گئے رواں مالی سال (2012-13ء) کے گیارہ ماہ (جولائی تا مئی مالی سال 13ء) کے دوران بینکوں کی جانب سے جاری کردہ زرعی قرضوں میں 15.49 فیصد کا سال بسال اضافہ ہوا اور وہ بڑھ کر 294.53 ارب روپے تک جا پہنچے۔ مطلق (absolute) اعتبار سے جولائی تا مئی مالی سال 13ء میں زرعی شعبے کو جاری کردہ قرضوں میں 39.51 ارب روپے کا اضافہ ہوا جبکہ پچھلے سال کی اسی مدت میں مجموعی طور پر 255.02 ارب روپے کے قرضے جاری کیے گئے تھے۔ پانچ بڑے کمرشل بینکوں بشمول الائیڈ بینک لمیٹڈ، حبیب بینک لمیٹڈ، ایم سی بی بینک لمیٹڈ، نیشنل بینک آف پاکستان اور یونائیٹڈ بینک لمیٹڈ نے مجموعی طور پر 156.98 ارب روپے کے قرضے جاری کیے جبکہ جولائی تا مئی م س 12ء میں 132.38 ارب روپے کے قرضوں کا اجرا ہوا تھا، اس طرح 18.58 فیصد کا اضافہ ہوا۔ جولائی تا مئی مالی سال 13ء کے دوران سب سے بڑے اسپیشلائزڈ بینک زرعی ترقیاتی بینک لمیٹڈ (ZTBL) نے 54.18 ارب روپے کے قرضے جاری کیے جبکہ پچھلے سال کی اسی مدت میں 54.17 ارب روپے کے قرضے جاری کیے گئے تھے۔ پنجاب پراونشل کوآپریٹو بینک لمیٹڈ (PPCBL) نے جولائی تا مئی مالی سال 13ء کے دوران 6.04 ارب روپے کے قرضے جاری کیے جبکہ گذشتہ سال کی اسی مدت میں 6.82 ارب روپے کے قرضوں کا اجرا ہوا تھا۔ 14 ملکی نجی بینکوں نے بھی جولائی تا مئی م س 13ء کے دوران مجموعی طور پر 61.87 ارب روپے کے قرضے دیے جبکہ پچھلے سال کی اسی مدت میں 51.67 ارب روپے کے قرضے فراہم کیے گئے تھے۔ پانچ مائیکرو فنانس بینکوں بشمول خوشحالی بینک لمیٹڈ، این آر ایس پی مائیکرو فنانس بینک لمیٹڈ، دی فرسٹ مائیکرو فنانس بینک لمیٹڈ، پاک عمان مائیکرو فنانس بینک لمیٹڈ، اور تعمیر مائیکرو فنانس بینک لمیٹڈ نے جولائی تا مئی مالی سال 13ء کے دوران 15.45 ارب روپے کے زرعی قرضے جاری کیے جبکہ گذشتہ مالی سال کے اسی عرصے کے دوران 9.96 ارب روپے کے زرعی قرضے جاری کیے گئے تھے۔ واضح رہے کہ اسٹیٹ بینک نے بینکوں کے لیے رواں مالی سال میں زرعی قرضوں کے اجرا کا علامتی ہدف 315 ارب روپے مقرر کیا ہے۔